Қарқаралы ауданында "Таза Қазақстан" экологиялық акциясы аясында ұлттық саябақта сенбілік өтті, деп хабарлайды DKNews.kz.
Оған табиғи қорықтың қызметкерлері, еріктілер мен қала тазалығына бей-жай қарамайтын белсенді тұрғындар қатысты.
Табиғи паркте жалпы халықтың күш-жігермен 20 мың шаршы метрден астам аумақтан қоқыс шығарылды.
Сондай-ақ сенбілік Қарқаралы аудандық орталық ауруханасының аумағында және қала көшелерінде өтті. Қатысушылар шамамен 5 мың шаршы метр аумақты тазалады.
– Біз әрдайым экологиялық акцияларды қолдаймыз. Жасым сексеннен асса да, осындай сенбіліктерге қатысамын. Ұрпақтарымызға таза және көркем табиғат қалдыру – біздің үлкен міндетіміз. Жеріміз құнарлы болып, еліміз өркендесін! – деді денсаулық саласының ардагері Серік Жекеев.
Экоакция басталғаннан бері (8 сәуірден бастап) Қарқаралы ауданының аумағында сенбіліктерге 2 мыңға жуық адам қатысты.
Тазалық жұмыстарына 40-қа жуық техника жұмылдырылды, ҚТҚ полигондарына 800 тоннаға жуық қоқыс шығарылды. Сонымен қатар, ескерткіштер мен мемориалдардың маңы абаттандырылды.
Жергілікті полиция қызметінің қызметкерлері тазартылмаған аумақтар үшін бес әкімшілік хаттама жасады.
