«Бәйтерек» ұлттық басқару холдингінің еншілес компаниясы – KazakhExport экспорт кредиттерін сақтандыру жөніндегі Ислам корпорациясы (ICIEC) – Ислам даму банкімен көп жылғы табысты ынтымақтастығының нәтижесінде «Жылдың экспорт-кредит агенттігі» сыйлығын алды, деп хабарлайды DKNews.kz.
Бұл марапат елдің экспорт әлеуетін дамыту, сауданы қаржыландыру мен инвестицияларды сақтандыру саласындағы жетістіктер үшін беріледі.
Бүгінде Қазақстанның экспорттық-кредиттік агенттігі сақтандырған барлық экспорт аккредитивтері облигациялық негізде ICIEC қайта сақтандыруынан өтеді. Қазіргі уақытта аталған шарт алыс және жақын шетелдерден 20-ға жуық эмитент-банктерді қамтиды. Аккредитивтерден басқа, ICIEC Әзірбайжанға отандық локомотивтердің лизингтік жеткізілімдері бойынша KazakhExport сақтандыруын қолдап, тәуекелдің үштен екісінен астамын өз мойнына алды.
Өткен кездесу барысында Қазақстанның экспорттық-кредиттік агенттігі және ICIEC қазақстандық экспортты дамытуға берілетін қарыздарды қайта сақтандыру саласындағы ынтымақтастықты кеңейтуді талқылады.
ICIEC басшысы Уссама Каисси өмір сүру деңгейін арттырудың, азық-түлік қауіпсіздігін қамтамасыз етудің және бүкіл өңірдің тұрақты дамуының негізгі факторы ретінде қазақстандық экспортты одан әрі дамытудың маңызын атап өтті.
Еске салайық, «KazakhExport» экспорттық сақтандыру компаниясы» акционерлік қоғамының кейбір мәселелері туралы және Қазақстан Республикасы Үкіметінің кейбір шешімдеріне өзгерістер енгізу туралы» Қазақстан Республикасы Үкіметінің 2024 жылғы 8 сәуірдегі № 261 қаулысына сәйкес «KazakhExport» ЭСК» АҚ экспорттық-кредиттік агенттік (ЭКА) ретінде айқындалды және атауы «Қазақстанның экспорттық-кредиттік агенттігі» АҚ болып өзгертілді.
